郭晉安、郭羨妮、郭政鴻、胡定欣同陳美詩等，噚日喺九龍灣宣傳無綫劇集《古靈精探B》，大會安排眾藝員打保齡球，成班人仲擺好多騎呢食雪糕甫士，講笑話要扮周秀娜。安仔噚日好鬼風騷話啱啱同老婆去咗北海道四日三夜旅行，佢話：「今次淨係同太太去好開心，激戰500回合！」
問安仔係咪去造人，佢話：「應該冇，呢個世界上有樣嘢叫避孕套o架！不過今次真係好有初戀感覺，因為我同太太初相識都係喺凍嘅地方。」安仔仲話自己今次旅行完簡直回春：「我同太太都後生晒，簡直回春呀，返嚟之後真係想孭書包返學！」
郭羨妮認老姑婆
安仔話第一次到北海道好興奮，仲買咗不少手信，可惜原來香港嘅百貨公司都有得賣。另外，郭羨妮話家傾緊大結局嗰晚約埋一齊食飯，講到之前有報道話佢係圈中老姑婆之一，佢都話：「我都冇拍拖又冇搵男朋友，都步向老姑婆o架喇，不過我家都好開心，投入工作冇乜嘢煩惱，所以都唔心急，都唔會介意人哋點寫，況且乜嘢都俾人寫過喇，都唔會激發我專登搵男朋友，要搵到好嘅先得o架。」