家啲全高清薄屏電視嘅價真係低處未算低，LCD液晶電視嘅價錢固然一直跌價，點知一向價錢比LCDTV貴一、兩成，畫質更勝一籌嘅Plasma等離子電視，最近仲大冧價。咪就係LG一口氣推出兩個系列Plasma，當中PS40嘅60吋電視只係賣36,800蚊；另一個PS80系列則有兩個Size，50吋賣16,800蚊（圖），60吋賣49,800蚊。
玩單層無框設計
兩個系列基本規格相同，唔同嘅係PS80貴在玩單層無框設計，個樣靚仔啲。講番新機規格同樂聲牌嘅Plasma都好類似，用上600Hz驅動系統，動態對比度2,000,000：1，反應時間0.001ms。兩款機仲攞埋THX證書認證。60吋PS40賣36,800蚊，真係大件夾抵食，同類Plasma賣成四萬幾蚊。
LG電子市場總監趙遠明話，本港較少品牌推出Plasma，但巿場仍有一班愛好者，所以一口氣推出兩大系列，以較低成本研製Plasma，定價可以平啲，迎合唔同客戶嘅需要。
亞洲高清協會會長李柏權（Alan）話，Plasma嘅畫質同LCD比較係靚啲，對比度高好多，顏色準啲；但係價錢就比LCD貴。今次LG以呢個價位開賣Plasma，都幾有吸引力，但消費者選購時，唔好單睇規格，仲要親自試睇，好似動態對比度2,000,000：1，意思係光同暗嘅差距，買家仲要睇清楚暗位層次夠唔夠，黑位係咪「一撻撻」，畫面人物移動嗰陣係咪清晰。