睇法庭新聞，甚有趣味，一啲案情直頭係匪夷所思，如果唔係控辯雙方在法庭細說真實故事，我地點會諗得到呀，搵阿寬與黎文卓加埋林超榮三個人一齊創作劇本，佢地都唔敢寫到咁癲啦，平時我地如果敢講兩句，畀當事人告誹謗都似。
譬如話，富豪原來比一般香港市民更加恐共，更以為黨員或近似黨員無所不能！九月九日報紙報導，富豪邱德根之子邱達昌，被一位有案底、坐過監，只係小學程度嘅黃坤才呃咗十八萬三千六百元。呢位黃坤才在二○○○年冒稱係新華社副社長鄭國雄，向浙江第一銀行董事長孔祥勉及當時東莞同鄉會會長講大話，亂噏話可以代兩人辦申請跨境車牌，並可以委任兩人為政協常委，索取二十萬元，被識破之後，警察拉人，黃坤才坐監十一個月。
到咗二○○七年十二月三日早上十一時，黃坤才揭電話簿，揭到邱達昌，於是打電話去，冒稱係中聯辦王如登，話可以代辦跨境車牌及委任邱為政協常委。呢條係死人行舊路嘅祈福黨橋段，但邱達昌立即在下午一時後由司機陪同，到西環中聯辦門外見到自稱係王如登助手嘅黃坤才，親自送上咗十八萬幾嘅現金。黃取款後就失蹤，邱後來報警，到咗二○○八年七月八日，黃坤才先至在內地落網，七月二十日回到香港受警察查辦，九月八日在法庭被判有罪，坐監一年。
如果有人打電話畀你咁咁咁，你會唔會：（一）報警；（二）搵廉記；（三）打電話去中聯辦搵王如登其人？何解唔理三七二十一，就擒擒青咁將十八萬幾去交畀自稱王如登助手嘅陌生人？王如登係中聯辦主任助理啫噃，有咁大影響力嘅？就算中聯辦主任彭清華親口對你講話搵你做政協常委，都未必百分百實掂呀嗎？我地可以推理得到結論，（甲）就係香港跨境車牌有市有價，唔易攞，內地發牌人士/機關揸住一樽肥仔水；（乙）富豪對中聯辦十分敬畏，奉若神明；（丙）富豪有一個印象，就係在內地辦事，無財不行，有人肯幫手而唔問富豪攞錢，先至係與常態不符。一個小學程度嘅積犯居然可以睇通睇透富豪嘅心態，證明一般街頭智慧勝過大學教授做研究。現在世界上有不少人到咗咁上下就會患上老人癡呆症，合晒騙子合尺啦。