唐唐唞暑後連環出擊，梁振英不敢鬆懈，噚日喺網誌話，自己都有接受有線節目《周梁有請》訪問，似乎想顯示自己冇輸蝕畀唐唐。
o靚模互寸娛樂性豐富，兩個政客爭曝光暗戰，八方覺得好墮落。梁振英稱與周梁認識超過廿年，接受訪問時感覺「特別輕鬆」，「像和老友閒話家常般的感覺」。梁振英雖然喺周梁節目俾唐唐飲咗頭啖湯，但噚朝就獲民記番，喺葉國謙邀請下，向逾30個保皇派區議員搞分享會。
分享會其實係區議員呻冇錢冇權聲討煲呔大會，區議員異口同聲群插所謂「小特首」之稱嘅地區民政專員冇料到兼阻頭阻勢，梁振英話呢方面同區議員「思路好接近」。忽然重視區議員，乃因區議員隨時係選委，2012年有份投票選特首，梁振英無寶不落嘅。