三位天王天后秘密結婚一次過被踢爆，娛樂新聞近幾星期嘅熱話都係：「結婚應該公開定低調？」結婚乃係人生大事、開心事，其實又使乜鬼鬼祟祟，計我話就應該越誇張越好，越多人知就越多人祝福。唔夠錢擺幾十圍酒席大事鋪張？一架出位嘅結婚花車，一樣可以幫你成為萬眾焦點，美觀之餘，最重要係可以獨一無二，幾巴閉！
記者：許維雅
攝影：王文忠
Model：Ava、Alex@Snazz
鳴謝：Hair@BACKPOWER（Alex）
婚紗提供：MFBRIDAL（23110006）
立體造型 匣子車最襯
話晒結婚一世人一次，花車獨特出位就最啱，使乜收收埋埋？StarJ就諗到立體花車呢一招嚟吸引顧客，利用立體裝飾佈置，將花車變成一架可愛卡通車。負責佈置嘅阿飛幫花車加帽、加煲呔變紳士，整埋對眼仔喺車頭就更加盞鬼。「西裝圖案係汽車專用PP貼，而立體裝飾就利用磁石固定，方便客人隨時拆除，喺馬路上行駛，拆咗佢安全啲。」鬼馬得意嘅立體裝飾可以隨客人心水設計，用自己車都得。」阿飛仲有啲建議畀大家：「最好就係揀外形可愛或者四四方方嘅車，好似Spike同bB咁。」
車身拉花 設計獨家
喺車身表面拉花雖然唔係咩新奇事，唔少公共交通工具嘅廣告都見到，不過拉花嘅花車就少見。阿飛指：「有人客唔想太Cutie，會選用名貴房車做花車，要突出又感覺獨特，我哋就諗到用一對新人嘅名去設計一個Logo，再將Logo貼喺車上面。」客人一樣可以自選Logo同設計，加自己個名落去，咁就同人「撞花車」都幾難。最大路當然係心心、玫瑰花等設計，想再出位過癮啲，就可以用一啲大家見慣見熟嘅Logo配襯。將架車咁大陣仗咁貼法，可能有人會怕搞好耐，但原來只需結婚前一日交車，即晚就可以攞走，結婚之後仲會幫你架車打蠟護理，清走PP貼，服務實在幾貼心。
至Hit倫敦的士
市面上有唔少租借花車服務，要數花車熱選之首非S-Class500L（俗稱：鳳眼）莫屬，以三小時計算，價錢約$1,000至$1,600左右，差別咁大在於唔同公司服務質素同汽車新淨程度。想與別不同，近期大熱就有古典味濃嘅倫敦的士，租車公司仲將架「的士」噴到粉紅色、粉紫色，夠晒搶眼，連一架28座豪華巴，三小時約$3,000，上網都好易搵到。不過就有人投訴過某啲公司花車甩底，又壞車，大家選擇時要小心。
萬二蚊組鬼馬車隊
專業花車車身佈置收費：約$12,000起
（包1架主花車及3架兄弟車嘅設計及粉飾，以及拆除貼紙後花車吸塵及主花車打蠟全套護理服務1次）
查詢：STARJWEDDING（22048995）
