勞資關係貴乎「互相利用」，自從澳洲昆士蘭旅遊局借絕世筍工宣傳旅遊之後，舉世商號爭相仿效。最新推出超級筍工嘅係微軟，配合Windows7推出，招募7位產品大使，日薪7,777港元，只返一日工做十粒鐘，聽落似乎幾筍。
做Windows7大使
產品大使只要年滿15歲便可應徵，條件係口齒伶俐、勤奮有禮、能操流利英語同廣東話、具基本電腦知識。難度睇落唔係好高，但應徵者唔得好似書展o靚模咁，棟喺攤位前任影唔嬲十粒鐘就完成任務。
微軟要求應徵者自拍一分鐘個人自我介紹短片，下星期六（9月19日）招募日，微軟會選出30個入圍應徵者，佢哋要參加微軟嘅產品介紹會，免費幫Windows7賣廣告，表現最好嗰7個，先有機會做產品大使，其餘就係白做。
計落最筍係微軟，花54,439蚊就做咁多宣傳，甘願被微軟「利用」嘅朋友，可以登入facebook網頁瀏覽： http://www.facebook.com/group.php?gid=144320970801，連美少女廚神都上載咗短片㖭。