新馬季明天開鑼，資深馬主唐唐亦進入狀態部署出擊跑馬仔。早前獲唐氏親友合力為參選特首造勢後，唐唐又接受前黨友周梁訪問，喺有線節目《周梁有請》中不否認有意選特首，更大談下任特首條件，佢話必須「過三關」才有資格上位。
要市民同公僕支持
節目今晚出街，有線噚日預先畀傳媒睇訪問片段，周梁追問唐唐是否選特首，唐唐唔答，不過指做特首「愛港愛國」係最基本條件，維護一國兩制、高度自治等等不在話下，其他條件亦缺一不可，就係要得到市民支持，對弱勢社群有承擔，亦一定要得到公務員支持，而香港社會商業掛帥，所以特首得到工商界普遍支持亦好重要。
呢幾個條件聽落好大路，實情都係衝着梁振英而來。最近有民調顯示唐唐民望大幅度拋離梁振英，誰人得到市民支持有目共睹，唔通市民鍾意幹部治港咩？唐唐係政務司司長，同公務員關係一直良好，梁振英卻警告公僕爭取加薪要「知所進退」，寧願做醜人都要㩒住公務員。
想做特首冇大孖沙祝福難成氣候，呢方面唐英年先天性佔優，梁振英似乎略為輸蝕，李超人唔願意證實係咪同佢見過面，見微知著，商家佬仍在觀望，待形勢明朗才落注未遲。除咗呢三度「門檻」，唐唐又強調特首「要有能力去執行」政策，否則得個講字冇用，佢以自己做財爺時推銷銷售稅經驗為例，話明知市民反對都不惜「迎難而上」，似在暗寸梁振英一直只係塘邊鶴，毫無執政經驗。
做唔到「親疏冇別」
迎難而上唔代表做得成，銷售稅結果都係胎死腹中，唐唐話日後唔怕處理棘手政策，因為「冇嘢爭議得過雙普選」。就咁聽唐唐自我推銷，以為佢比梁振英好得多，且慢，被問到特首係咪應該「親疏冇別」，佢一邊話包容重要，一邊卻話「香港唔可能所有人都包容晒，否則個熔爐會太理想化。」睇嚟香港一日冇普選，特首親疏有別都會係遺傳絕症。
唐唐接受港台訪問時又踩多梁振英一腳，被問到支持度遠超對方時，佢話唔揣測原因，只係相信「市民眼睛係雪亮嘅。」
mailto:[email protected]