鄭秀文（Sammi）上月隨宣明會出發到非洲埃塞俄比亞探訪當地貧困兒童，佢探訪時發現當地好多家庭都同佢一樣信耶穌，令佢好開心。Sammi除咗到學校派習作簿同文具畀小朋友，又探訪家庭同佢哋傾偈。Sammi仲探訪咗一個模範農民丹圖，因為佢將自己所識嘅農耕技術教授當地農民，令佢哋可以自給自足。
聖誕跨年開騷
Sammi噚日透過助手話出發前唔知非洲天氣咁反覆，一落機好凍，於是要去商場買褸，點知喺女裝部見到件過千蚊嘅皮褸，Sammi覺得今次去探訪唔應該使咁多錢，於是走到童裝部買咗件百幾蚊嘅厚褸。
另外，Sammi今年聖誕會喺紅館舉行跨年演唱會，佢對上一次07年嘅「ShowMi」演唱會狀態大勇，而且操出兩隻老鼠仔㖭。Sammi話家要開始keep弗，因為佢一定要搵番呢兩隻老鼠仔，仲好有信心今次體力上完全冇問題。Sammi又話一年收成10幾個劇本，由於角色唔啱，現時佢都係主力籌備演唱會。