近期似乎有個「馬」字嘅名人都唔多老利，由阿根廷英雄馬勒當拿帶領嘅國家隊，噚日作客0:1敗走巴拉圭，老馬嘅聲望恐怕同台灣總統小馬哥一樣急插水。老馬賽後話「流淨最後一滴血都要帶阿根廷入決賽周！」，言重喇，我求大俠仍然對阿根廷出線好有信心，我擔心嘅反而係就算隊波入到決賽周，到時仲係咪由老馬揸旗都成問題。
變陣都輸俾巴拉圭
南美洲區世盃外形勢清晰，雙巴已出線，智利應該都問題不大，剩番一個出線名額、一個附加賽名額大概由5隊去爭。阿根廷下場主場對秘魯穩贏，到最後一場作客死敵烏拉圭唔輸應該都冇問題，但噚日場波嘅水平，就好大問題。
對巴西輸波後，老馬噚日變陣，包括押注喺準女婿阿古路身上，由佢夥拍美斯攻堅。我求大俠由開波睇到巴拉圭球員賽後點樣聚埋一齊歡呼、祈禱慶祝出線，綜觀全場，阿根廷踢落完全唔係波，巴拉圭由多蒙特嘅當勇前鋒希度華迪斯上半場射入全場唯一入球，已經算贏得少。
巴西靠尼爾馬破智利
再睇阿根廷想谷但谷唔起，衰到起勢斬波畀巴勒莫去頂，呢種水平，試問阿根廷足總高層同球迷點會收貨？話老馬個帥位唔危，搵鬼信！阿根廷傳媒賽後就勁插老馬，球王都冇面畀，好似《奧萊報》就話：「國家隊要重組，馬勒當拿唔應該係咁嘅款！」《大眾報》亦老實唔客氣：「馬勒當拿與生俱來就唔係教練料子。」
最慘仲係巴西之後半力照贏智利4:2，巴西喺領先兩球後一度被扳平，當時仲有菲臘比美路粗暴踢人被逐；但尼爾馬爭氣，喺中後段連入兩球，全場個人大演帽子戲法贏夠4:2。講開又講，呢場波大家諗住睇阿祖表演，但佢冇乜料到，反而彈出個尼爾馬，阿祖要檢討吓喇。
