鍾景輝（KingSir）、李司棋相識幾十年，最近終於有緣相聚，合作拍電視劇《有營煮婦》。在新劇中二人飾演一對銀婚夫婦，為了一個女，一頭家，一份工，他們變成歡喜寃家。KingSir同司棋姐打造溫馨寫實家庭小品，不知能否感動觀眾呢？
兩個好戲之人，終於有機會碰頭了。鍾景輝由舞台劇跳入電視台，《甜孫爺爺》令人記憶猶新，李司棋在電視圈穩守突擊，《溏心風暴》令人拍案叫絕，兩個人大打溫情牌，今次首度合作，司棋姐又驚又喜，她說：「真係識咗KingSir好耐，佢係一個好好老師，但係一直都未有機會真正合作，終於家先有機會，當我聽到係同KingSir做夫妻，我好緊張，喺度諗我點做好呢？不過真正拍嘅時候，好易入戲，做得好順，真係好開心可以同KingSir合作。」
曾患頑疾飲食清淡
司棋姐在《有營煮婦》中是由一個家庭主婦變成一個主婦明星，而KingSir是一個正面對退休，患上疑似退休恐懼症的男人，這套劇圍繞好多有關飲食的知識。司棋姐早年患有子宮癌，KingSir曾經割膽石，兩人病癒之後，怎樣過他們的有營飲食新主意？司棋姐說：「我其實好曳，好為食，我應該注意飲食，不過有時見到好想食嘅嘢都會忍唔住食囉！」
對於美食，KingSir較有節制，他說：「我退休之後一度變好肥，所以要減肥，同埋我有個親戚係營養師，佢成日都會提點我要食得清淡，我減咗肥之後，都有刻意控制飲食，家都keep得幾好，140幾磅。」
笑鍾景輝閉目養生
除了注意飲食，司棋姐同KingSir都有自己的養生之道，司棋姐說：「我知道KingSir點樣養生，佢真係好勁，嗰場戲一冇佢，佢就會坐埋一邊閉目養神，仲可以好易瞓着，呢樣真係好犀利。」司棋姐認為無論甚麼年紀都可以多運動，她說：「我覺得我同KingSir可以去學社交舞，你唔好睇佢呢個身形，KingSir跳得好好睇。」
採訪：楊潔雯
攝影：仇志德