前特首老董退下來後十分低調，平日罕有露面，近日愛國人士熱烈迎接十‧一，身為政協副主席嘅老董亦頻頻出席畀面派對。噚日早上佢現身「港澳同胞奉獻祖國六十年」圖片展時致辭，八方現場所見，老董風采依然，當佢再講出「香港好，國家好；國家好，香港更好」金句時，八方一股莫名感受湧上心頭，絕非筆墨可以形容。
闊別多時，老董似乎有好多話想講，噚日傍晚應香港青年協會邀請，同學生真情對話，老董在位時不時搞親民騷，離任後久不彈此調，重出江湖老董有備而來，真情對話前先發表演說，認為建政100年時就有民主。
中共今年先建政60年，竟然要一個世紀先有民主，咁咪即係要等多40年？中國仲有幾十年先有民主，咁香港咪仲弊？老董唔係記錯咗「中華民國」啩，不過台灣早已一人一票選總統，唔使100年先有民主喎。
人大政協都算民主
老董講嘅「世紀民主論」，令現場學生晒頭，有人問佢中國係咪要等多40年先有民主？佢並冇解釋世紀民主論有乜根據，反而講咗佢心目中嘅民主係乜嘢。老董話選舉只係過程，目的係搵一個好政府，最重要係法律面前人人平等，冇人有特權；佢又話人大同政協都係體現中國有民主嘅制度。八方才疏學淺孤陋寡聞，人大、政協全部係橡皮圖章，「董氏民主觀」咁超然，似乎係佢潛藏多時創造出嚟，真係唔簡單。
學者批評想法粗疏
八方請教中大政治學者蔡子強識否「董氏民主觀」，蔡子強話人人平等只係民主必須條件之一，並非等於民主全部，老董咁講，恐怕係因為退任後與共幹過從甚密，因此師承共產主義，以為人人平等就係民主，卻不知實際係人人平分身家共產咁解，「其實佢咁講絕不奇怪，只係佢一貫對民主概念認識殘缺不全，而且相當粗疏嘅想法。」
至於所謂建政100年才有民主，蔡子強直斥係歪理，「根本冇任何理據咁講！」聽完學者咁講，八方心中一凉，青協請老董講話，豈不教壞細路？定係想搵佢做反面教材呢？
mailto:[email protected]