父母結婚35周年的紀念日，你會送上甚麼禮物？炮製豐富晚餐？名貴手錶？林一峰和林二汶決定送上一份獨一無二的禮物給父母，就是在紅館舉行首次演唱會，他們希望入場的萬多名歌迷，與他們一同為父母慶祝這個特別日子。
林一峰與妹妹林二汶將於下月6日在紅館舉行「一峰二汶好天氣演唱會」，作為送給父母結婚35周年的禮物。原來林媽媽等待一峰和二汶在紅館開騷等了很久，林一峰說：「媽咪一直好希望我哋喺紅館開演唱會，今次可以話係天時地利人和，有人幫我哋搞騷，加上又係老竇媽咪一個咁有紀念性嘅日子，所以一定要搞大佢。」
大爆父親送驚喜
開騷前，林一峰和林二汶先踢爆父母的浪漫史，二汶說：「我阿媽份人好坦白o架，佢同我講老竇後生好靚仔，第一次見到老竇時個心跳得好厲害，之後就嫁咗畀佢啦，同埋佢好摩登，從來冇許下過一生一世嘅承諾，咁多年嚟兩個人都係向同一目標向前行。」
林一峰透露父親前年在母親生日時，製造了一個浪漫的驚喜，他說：「老竇喺memo紙上畫箭嘴，之後就好似玩野外定向咁，叫阿媽跟住啲箭嘴搵份生日禮物，最後阿媽搵到一塊玉。兩個人結婚35年都仲咁浪漫，真係唔係咁多對夫婦做到。」
林一峰的愛情觀也受到父母的影響，他相信一生一世的愛情，每次拍拖都會視女友為最後一個，他說：「我唔係玩玩吓，每段感情都好長，次次都希望對方係最後一個。」
鬧兄拍拖失自我
林二汶又踢爆一峰有次談戀愛，因過份投入而迷失自我，她記得那次走到哥哥房門前爆粗，她笑說：「我嗰次真係好嬲，因為媽咪話阿哥拍拖拍到冇晒自己，令到佢好擔心。於是我走去佢房門就鬧佢『你睇吓你拍拖拍到似乜，可唔可以唔好咁樣呀，成家人都擔心你呀！』」估不到身為妹妹的二汶在感情路上，會反過來教訓哥哥。
採訪：李珮洳 攝影：陳慧安
髮型：WinkyofPOPHairDressing
化妝：KrisWong
場地提供：Termini