金融海嘯，人人荷包縮水，慈善機構收到嘅善款數字都大幅下跌，個個機構為籌款未達標而發愁之際，偏偏有啲私人機構想捐款都冇人敢要，之唔係煙草商囉！英美煙草公司幾年前每年都有幾百萬元嘅慈善捐款預算，近年卻冇人願收煙草商捐款，令佢哋捐款數字漸漸縮水，今年只捐出20萬元予一個盲人團體買手提電腦。
畀錢都冇人要，英美煙草高層埋怨特區政府強力禁煙，搞到吸煙神憎鬼厭，連煙草公司嘅錢都變成「黑錢」。好多NGO亦受壓，怕收咗煙草公司捐款，會令其他想捐款嘅機構反感，因小失大仲弊，所以英美煙草近年改變慈善策略，減少捐款預算，鼓勵員工多做義工。