三個退出自由黨議員成立「經濟動L」冇耐，麻雀雖小卻胸懷大志，向組黨目標進發，最近設立八個包括經濟、珠三角以及社會發展等專責小組，定期議事論事並向政府提交意見，似有政黨雛形。可惜三位話事人林健鋒、梁君彥同梁劉柔芬仲係猶抱琵琶半遮臉，唔肯講明出年係咪組黨成熟時，話要睇吓外界反應。
畫公仔唔使畫出腸，佢哋三位都冇擔任八個小組召集人，似乎係預留自由身，部署有需要時做黨領導。佢哋鐵定每隔一、兩個月就辦一次講座，滙豐鄭大班會做頭炮講者。經濟動L另一「掛名」成員新界王發叔噚日照例冇喺傳媒聚會時蒲頭，最熱愛「自由」嘅似乎都係佢囉。