上星期飲茶之時，餐飲M睇報紙，一全版有四段新聞，半版講醫學大教授判監二十五個月，四分一版講愛爾蘭籍教育學院副教授判監九個月，八分一版報道男生高買，另外八分一版講女生使用偷回來的信用卡，全部都係香港大學人士。餐飲M睇到唉唉聲咁話：「我哋母校格物好叻，明德就唔記得咗！」旁邊律師W立即回應：「唔係呀，母校法律系有開ProfessionalEthics一科呀。」法律系教專業倫理，不同整間大學講授「明明德」，但大學生來自各階層不同學校，中學時唔學習道德觀，入到大學，只得三年，點教呀。大學唔係道德學院，係知識傳授之地，以前嘅講法係老師有「傳道授業解惑」三大功能，不過如今大學教授要俾學生評級，評級低者，可能冇得留低，逼住畀分要鬆手啲，教書要userfriendly啲，總要大家happy，互相識做，甚麼「傳道授業解惑」，教授不理，大學生無意於此。
發生於港大之事，亦可能發生於任何大學。不過港大唔好彩，幾件負面新聞同日出街，報紙廣泛報道，先至令到徐立之校長心痛，要在九月六日凌晨三時發出午夜電郵畀學生、教員、校友，以校訓明德格物為題，提醒佢哋港大之成功在於崇高道德與誠信。咦，徐校長出身四年制嘅大學，佢嘅母校校訓就係「誠明」，學規第一條就講「求學與做人，貴能齊頭並進，更貴能融通合一。」呢啲道理不妨發電郵講多幾次。
港大學生讀書係叻嘅，故此餐飲M堅持佢哋「格物」好醒。譬如最新發表之全港三年級學生之二○○八/二○○九年度考IELTS成績，港大生連續七年第一，全港一萬一千七百九十名學生嘅平均分係6.69，港大生以6.99考第一，中大生得6.91繼續屈居第二，科大生以6.74排第三，除咗中大生可以貼近港大外，其餘嘅差距不容易縮窄。在四個測試項目中，reading（閱讀），中大生第一（7.75）、港大第二（7.71），其餘三個分別係listening（聆聽）、writing（書寫）、speaking（會話），港大生得7.53、6.17、6.31居第一；中大生得7.36、6.09、6.16全列第二，其他大學不妨急起直追。