人稱「林狗」，別號「09」嘅林海峰，為紀念09年9月9日呢個日子而推出紀念冊，噚日佢為呢本叫「AreYouKidding???」附DVD嘅紀念冊喺中環搞咗個展覽，每本賣300蚊，扣除成本後捐畀天比高創作夥伴。
鍾意窒吓人嘅林狗，繼續借周秀娜同黎明嚟搞吓宣傳，佢本紀念冊只印1,000本，扣咗成本實數捐唔到幾多畀天比高，林狗話：「就算有o靚模寫真咁好賣都唔會有太多錢，因為得1,000本，我又冇滴雪糕。」
做善事博上天堂
不過，做善事總係好嘅，林狗就好衰咁話班記者應該上唔到天堂，又話好多朋友都應該係去地獄，佢自己想做啲對社會有貢獻嘅事，希望第日可以上到天堂喎。
林狗今個月17號開talk騷，佢之前話想請黎明做嘉賓，問佢黎生係咪應承咗？林狗好抵死咁話：「未覆，我家再講係第二次正式邀請佢，再講三次就冇誠意好虛偽，我只會講三次，唔會再講第四次。」