東亞運舉行在即，警方東九龍衝鋒隊約100名警員噚日荷槍喺田徑賽場館將軍澳運動場進行反恐演習，模擬多名恐怖分子佔領場館，並挾持人質同警方對峙。八方噚日喺現場直擊整個演習，見到除咗有警員扮恐怖分子外，仲有人扮埋運動員、觀眾、市民同記者。
東亞運模擬反恐
新疆武警「保護」記者有功，毆打「煽動鬧事者」令香港市民大開眼界，香港警方似乎都學到嘢，噚日演習過程逼真，氣氛緊張，同武警「維護穩定」場面不遑多讓。演習大約下午兩點鐘開始，有多名恐怖分子佔領將軍澳運動場，成百個配備MP5輕機槍、雷明登霰彈槍等長短火嘅警員殺到包圍運動場，同時喺附近高點戒備，又搵屏障掩護。全部警員着晒避彈衣，雖然係演習，但所有人神色都好凝重。
發現被包圍後，恐怖分子不甘示弱開火還擊，雙方駁火期間仲有市民受傷㖭，「傷者」十分專業，卧在路邊待援時呼救：「我受咗傷，好痛呀！」令場面頓添幾分殺戮街頭feel。正當警員冒險營救人質時，一名戴頭套恐怖分子忽然單人匹馬試圖殺出重圍，八方唔使睇劇本都知，壞蛋當然冇好下場，果然佢好快就被警方擊倒，拖離現場。
演習「保護」記者
警方同恐怖分子對峙時有個特別環節，就係模擬有記者到場採訪，仲想深入最前線拍攝，警員要「保護」記者，第一時間攔阻，好彩今次香港警方對傳媒唔算太「疆」，冇拳腳交加兼警槍警棍侍候，至於東亞運舉行時一旦發生保安事故，出現同類場面，警方對待傳媒有幾「疆」，八方暫時唔敢想像。
呢場大龍鳳搞到下午約4點鐘先鳴金收兵，中途有幾架新款裝甲車到場增援，最後五個恐怖分子束手就擒，人質安全後分批疏散離開運動場。警方消息稱，東亞運臨近，警隊近日喺其他比賽場地亦有進行保安演習。現場消息則話，噚日演習有機動部隊教官在場指揮，即場教授佈防技巧同攻敵戰術，所以參與演習人員咁認真，萬一有差錯隨時要寫報告o架。
mailto:[email protected]