2009年9月9日，三個9字並存嘅一個日子真係世紀難遇，除咗吸引小情侶喺呢個長長久久日子訂終身，就連全中國最大嘅壽險公司中國人壽（2628），都千挑萬選呢個日子舉行上市以來第四個公司開放日。
國壽董事長楊超有冇睇過通勝、擇個吉日，華華不得而知，不過楊總噚日喺「國壽2009年全球公司開放日」上振振有詞，對住在座50位中外記者講，國壽「做大做強做優做久」，所以就喺09年9月9月朝早9點，喺福建武夷山舉行開放日，早上會見分析員，下畫見境內外傳媒。
楊總謙稱「做得大非很強」
雖然楊總話要「做大做強做優做久」，不過佢就好謙虛話，家國壽「做得大，但不是很強」，今年中期業績雖然報捷，但同市場上頂尖保險公司仍有距離。
金融海嘯後，唔少國際頂尖保險公司都現財困，有實力嘅公司買少見少，而國壽冇乜點受金融海嘯冲擊，而且業務仲有增長，其實話唔定頂尖保險公司反過來要以國壽為目標呢！