炒股，好多時要講隻股票有冇「火」，一隻股票有「火」，即係買盤強橫，係都要砌上去，呢樣要講幕後嘅氣魄。好似做人咁，若然冇「火」，可能就冇晒鬥心。所以，一定要保持心中一團火，唔可以熄滅。
點知隻股夠唔夠「火」？梗係要從股價表現去衡量，有時「虛火」都唔緊要，因為散戶只要把握到快閃機會，極速短炒一樣搵到食。舉例，中亞能源（850）昨日一度異動，股價曾升見0.435元，以為新一浪升勢發動，點知又有沽盤質番轉頭，平收0.42元，似乎大戶仲未收齊貨，只係「虛火」。
目標睇9元
相反，京信通信（2342）就真係有「火」，該股昨日一度跌至6.54元，但低位即有買盤推上，拗腰倒升之餘，更一舉突破52周高位7.50元，及後升勢更停不了，急升11%，高收7.72元。咩叫有「火」？有辦你睇。
京信通信上半年純利大升2.2倍，達2.32億元。業務受惠3G大時代，料該股持續上試高位，伺機買入，目標9元，跌穿6.50元止蝕。
方星俠