謝霆鋒前晚一身邋遢look，於中環拍攝夏永康新片《熱辣辣》外景，片中他要駕駛綿羊仔穿梭街市，但因他沒有電單車駕駛執照，故由替身代勞。其間謝賢（四哥）到場探班，73歲的四哥寶刀未老，更請纓做囝囝的替身。
由著名攝影師夏永康（WingShya）操刀執導的新片《熱辣辣》日前秘密開工，據悉該片卡士包括謝霆鋒、張學友、周迅、Angelababy和緋聞男友陳偉霆等。
前晚霆鋒在中環舊街市拍外景，被傳大肚的張栢芝未有到場探班，反而謝賢突然殺到，還即場向囝囝大講鐵騎經。當晚天氣炎熱，霆鋒滿身大汗濕透背心，其長褲則滿是污迹，加上他着波鞋踩踭，造型甚為邋遢。
沒有電單車執照
攝製隊拍攝霆鋒駕綿羊仔尾隨一名揸電單車的女演員駛經街市的鏡頭，但因霆鋒沒有電單車駕駛執照，故由替身上陣。未埋位時，霆鋒坐於一旁休息，其間戴墨鏡、穿白褸的四哥瀟灑現身，霆鋒即向記者說：「快啲影佢啦，佢好耐未試過嚟探班啦。」
懶理女拍檔炒車
四哥向囝囝大講電單車經之餘，又半褪外套顯示其肩臂肌肉，現場隱約聽見他自動請纓當霆鋒的替身，他笑言：「佢冇牌，我有牌吖嘛，好唔好呀？戴個乜嘢（頭盔）睇唔到嘅。」同場一名女演員拍攝駕駛電單車戲份時，不慎炒車受傷，工作人員為她清潔傷口，但霆鋒未有上前慰問。
採訪、攝影：羅德光
