花旗股市放完假反覆炒上，但係高位有沽壓，仲未有勢大升。港股連升4日之後，見花旗股市冇乜動靜，噚日跌番218點，但係同近日累積升幅相比，跌幅好細。
現貨成交又回落至700億元樓下，投資者入市嘅興趣唔係好大，個市如果又轉為橫行，成交好快會縮番到500億元水平，到時大戶又會玩挾即市倉為主。
新世界C輪16953：新世界發展（017）昨收17.14元，跌0.69%，幅度算溫和。股價前日突破20日線，後市有機會試8月高位18.96元，破位睇20元，可以諗吓隻C輪16953。
隻輪現價48仙，2010年4月29日到期，行使價14元，溢價9.6%，引伸波幅66.6%，有效槓桿2.6倍，正股升上20元，16953睇70仙，正股跌穿16元，就沽咗隻輪止蝕。
俊樺