政務司司長唐公子條命生得正，就算俾煲呔燉佢做「護樹隊長」，都打擊唔到佢民望，未出閘特首跑馬仔遊戲已經拋離行會召集人梁振英。雖然唐公子形勢大好，但都唔係冇暗湧。
唐公子工作重點之一係周遊珠三角，為港商搵商機，出身商界嘅佢自然優而為之，何況可以趁機拉攏商界支持者，何樂而不為？不過八方聽聞部份商界人士對唐公子開始有微言，事關唐公子每次出巡珠三角都召集一百幾十名港商隨行，名為招商，實際卻係做人肉佈景板為高官造勢。
八方翻查資料，今年4月至6月唐公子先後出訪珠三角九市，次次都陣容鼎盛，至於有幾多實際效益，暫時唔知，可能要睇長線啦。有商人同八方講，呢啲畀面派對一次起兩次止都好足夠，點知今日又嚟多次，唐公子會去廣州出席廣東省粵港澳合作促進會成立大會，商人應酬無非係想做生意，但煲得太多冇米粥，卻恕難奉陪，所以有人已私下講，月內兩個交流會都會杯葛唔去。