中央送大禮，最終唔係QDII或直通車之類，而係更高層次咁確認香港的人民幣離岸中心地位，市場憧憬中央將加快開放資本賬，大行建議由A股換馬至H股。亞洲股神四叔亦喺減持聲中睇好港股，呢次講到明超碼會見23000點。
市旺，阿里的爸爸馬雲首次減持，套現2.7億元。TPG基金想學佢呢股「階段性成就感」，減持聯想集團（992）2.9億股，套現超過10億元。原本係中科院做大股東嘅聯想控股（聯想集團的控股公司），將29%股份配售畀中國泛海控股集團，令泛海穩坐呢間集資訊科技、投資、地產等控股公司嘅第三把交椅。聯想控股引入新夥伴後，董事長柳傳志即刻話要嚟香港上市，但原來泛海的背景亦不容忽視。
泛海控股話事人盧志強，據統計係內地地產界首富，身家近300億元（人民幣．下同）。呢單刁盡顯佢嘅財技了得，有評論指聯想控股29%股權作價27.55億元實在太平，按8日聯想集團收市價計，聯想控股持有其45%股權，市值約140億元，以此計算，聯想控股29%股權市值應超過40億元。
民企巨頭搞泰山會
咁大隻蛤乸隨街跳，原來因為一個秘密組織「泰山會」。英國有全球最大的地下組織共濟會（Freemasons），全球有500萬會員，自18世紀開始一直係上流社會的秘密智囊團，大家守望相助，維護有錢人的最大權益。美國的骷髏會（SkullandBones）就係耶魯尖子的俱樂部，每年只收15人，歷代有3位美國總統都係會內精英。
泰山會又係乜？就係中國近代傑出企業家的互助委員會。呢個會係九十年代初由柳傳志、四通集團創辦人段永基及盧志強等十幾人創立，原意係喺生意上大家交流意見，但當遇上逆境，就會召開「幫拖會」。10年前就幫過IT巨人史玉柱的投資失誤脫險，至令佢近年可以東山再起，將國產名酒五糧液搞得有聲有色，重回福布斯全球富豪榜500強。
盧志強的泛海，除咗係龍頭地產股，旗下泛海控股及泛海投資，原來亦控有民生證券、民生銀行、海通證券。而泰山會會員史玉柱亦控有民生銀行，復星國際（656）的郭廣昌同史玉柱喺美國上市的巨人網絡有關，幾個人關係千絲萬縷。總之，It'sasmallworld，只要看穿中國大民企的「人物關係圖」，個別公司的動作所引發的連鎖反應，勢必無所遁形。
胡孟青