馬季即將開始，馬主H本應輕鬆愉快，佢個賽馬團體（Syndicate）有隻馬在練馬師悉心照顧之下，逐漸恢復狀態，睇毛色，仲油潤過前季贏馬之時，而且肌肉脹卜卜，只要出賽一場減吓肥，就有資格爭頭馬。練馬師早已計劃在開鑼日報名出賽，熱身一場就會搏命o架嘞，誰知上星期試咗一課大閘之後，隻馬觸傷舊患，獸醫檢驗後認為不宜作賽，建議退役，練馬師好失望，因為已花了不少心機也。馬主H知道後，更加冇癮，唯有嘆一句養馬就是這樣的，久無表現之馬，總不能又養多大半季畀佢養傷嘅啫，你估復出後一定會贏幾場嘅咩，家養馬費你估便宜呀。於是人地準備迎接新馬季之時，馬主H就要簽馬匹退役紙，為之扁晒嘴。
馬主U又係扁晒嘴噃，原來佢因公事出差，九月十三日不在港，但佢有份嘅兩隻團體馬，放在不同馬房不約而同報咗名在九月十三日出場，而且兩隻馬竟然同場㖭！馬主N話：「有冇咁蹺，兩隻馬一Q返嚟，而馬主U不在場呀！」係又好呀，不過好少馬主有咁好運氣嘅，有一隻在前三名返嚟，已經開心嘅嘞，好多時係希望愈高，失望愈大嘅，做馬主咁耐，大家都睇到化啦。
馬主N知道報名表出賽馬之後，立即上網查看馬主U兩隻馬嘅操練情況，不睇猶可，一睇就吃驚，同場另外十二隻馬隻隻一早開操，勤力到極，而且有馬已經試咗兩次閘，動態非常積極。馬主N話：「咦，睇嚟今季係搶錢格噃，過往慢熱嘅練馬師都操馬操得好落力，冇一個悠悠閒閒嘅！」
金融海嘯之後，當知市場無常，長期投資之心態已變，人人改為走短線，賺咗先至算，持有匯豐十年八年，咪得個驚字，三十三元一股，記憶猶新也。馬圈人士如果仲係睇長線，將隻馬保留實力，慢火煎魚嘅話，執輸嘞，等到馬主冇耐性，拉馬轉倉嘅話，原練馬師咪睇住下手風光囉；阿爸嗰代有「燉馬」之說，今日如有練馬師「燉馬」，三季之內，冇埋練馬師牌照都似，馬主肯陪你癲咩，實會早拉馬轉倉早着！