做到足球員，都唔係個個身家豐厚嘅；好似費倫天拿前鋒梅度咁，估唔到踢咗咁多年波一樣「莫財」，十足自己個名咁「霉」。話說梅度前球會車路士，繼續追討佢04年10月、因吸毒單嘢而爭落嘅1,460萬鎊（約1.9億港元）債項。點知梅度講到明冇錢賠，仲入信國際足協求助，希望做義工填番條數喎！講真，主席白禮達肯，車仔都唔肯過你啦！
寫信畀白禮達求救
聽講梅度今次嘅態度好死狗，已向車仔「耍晒冧」，認當年自己做得好錯。係人都知車仔班主阿巴莫域治有錢到爆，1,460萬鎊對呢位油王嚟講，可能同買杯雪糕食冇乜分別；之但係人哋會唔會玩殘你，死都要你賠足，梅度你點做都冇符。
梅度深知唔對路，日前親自入信國際足協主席白禮達，睇吓呢位咁有名望嘅老人家拆唔拆得掂；封求救信大致話：「我交唔到條數出嚟，我建議不如我做義工，去幫啲曾經吸過毒嘅年輕人改過，或幫啲細路戒賭好過，而車路士咪當慈善捐款囉！」
講動人說話想唔使還錢
梅度呀梅度，我求大俠好老實講句，就算你去山區起學校扮有愛心，又或者做善事回饋社會，但呢啲統統唔關車仔事喎！無啦啦要人拎1,460萬鎊出嚟，自己就以「慈善」呢個咁好聽嘅名去避債，似乎講唔通啫；梅度仲喺封信嘅尾段提到：「我今次呢個建議，係想令犯過錯嘅人，對生命得到一個新價值，同時身邊有人去幫助你，唔會被遺棄。」
唉，如果個個債仔都學梅度咁冇錢還畀債主，然後噏一大堆動人嘅說話就唔使還錢，啲銀行全部執晒笠啦！
計我求大俠話，梅度應該先向阿巴斟茶認錯，再搵舊隊友幫手講好說話，可能成件事會冇人知，又唔使咁瘀咁核突啦！