今個月22號係國際無車日，綠色和平噚日派人踩單車去到禮賓府塞住個閘口，話要送架單車畀特首煲呔，希望佢以後每朝早去教堂祈禱，唔好再坐排放廢氣嘅特首座駕。
綠色和平話三司十二局官員已應承參與無車日，當日唔坐官家車，惟獨特首未表態，所以佢哋踩上禮賓府，想知道特首係咪得把口話環保，實際每朝都要坐車去祈禱製造廢氣。禮賓府人員只肯接收綠色和平請願信，卻堅拒接收部國產鳳凰牌單車，八方相信煲呔唔會輕易屈服，相信佢「有排碳」。
不承諾參與無車日
綠色和平亦唔肯認低威，最後將單車放喺禮賓府門口，八方詢問特首辦如何處置架單車，同埋特首會否參加無車日，發言人回覆稱特首同其他司局長會喺顧及工作安排同實際需要下支持無車日，如何支持細節欠奉，即係冇承諾參加。至於特首唔踩單車，係基於保安理由唔適宜用單車代步。至於部單車有乜下場，特首辦話會適當處理。八方希望唔會好似福鱷咁要人道毀滅啦。