英超新貴曼城嚟緊禮拜六會喺主場大戰阿仙奴，未正式埋牙曼城經已贏咗個勢，事關佢哋有半隊正選好似係艾迪巴約、高路托尼、羅賓奴同泰維斯，都唔使喺禮拜三嘅世盃外圍賽上陣，可以好好招呼隨時經已踢殘嘅阿仙奴。
羅賓奴泰維斯歸隊備戰
否認非法羅致雷恩法國新星希倫嘅曼城陣中粒粒皆星，禮拜三嘅世盃外點會冇佢哋份？不過佢哋好彩，咁啱科特迪瓦同多哥冇比賽，所以高路托尼同喺3場聯賽入3球嘅艾迪巴約，踢完上個周末嘅世盃外就可以歸隊。至於巴西上場作客贏阿根廷後出線世盃，教練鄧加亦提早畀大腿有微傷嘅羅賓奴返英國。阿根廷前鋒泰維斯就因為扭傷右膝退隊，同羅賓奴一樣喺禮拜三掛免戰牌。消息話泰維斯有可能踢唔到對阿仙奴場波，但我求大俠縱橫波壇十幾年，就深明好多時呢啲新聞都係煙幕。
睇番曼城個正選陣，除咗以上4位球星，愛爾蘭門將基雲獲准唔使打禮拜二對南非場友賽，英格蘭後衞米卡李察士同愛爾蘭中場艾利蘭則冇入選。另外，尼史葛、布歷治、巴利同胡禮菲臘斯都要踢禮拜三英格蘭對克羅地亞場大戰，但淨係得巴利、胡禮仔有望正選，更何況場波喺倫敦打，踢完返曼徹斯特唔會太遠。
驚阿仙奴兵國際賽打殘
阿仙奴就唔同，雖則佢哋嘅西班牙門將艾蒙尼亞（冇入選）、比利時後衞華美倫（停賽）、巴西中場丹尼遜（冇入選），喺禮拜三都冇份打，但埋單計落要踢嘅球員水蛇春咁長，包括俄羅斯艾沙維、丹麥賓特拿、克羅地亞伊度亞度達施華、荷蘭尹佩斯、西班牙法比加斯、喀麥隆桑治、法國戴亞比、基捷基治、加拿斯同沙格拿，當中有風流波，但亦有硬嘢，隨時踢殘。之前雲格成日抱怨國際賽搞傷晒啲球員，希望今次唔會啦。講真，曼城對阿仙奴好好戲碼，我求大俠都希望兩邊都可以「夫添」，合演場好波就好喇。