下屆特首跑馬仔遊戲一觸即發，準候選人梁振英脫腳，另一熱門唐英年未出閘，支持者已經好興奮。噚日一個招商會好似變成唐唐造勢大會，唐家軍亢奮到好似下任特首已經出爐，想預先為佢加冕。
香港無錫商會噚日舉行第二屆會董就職禮暨合作懇談會，呢個商會唔普通，唐英年父母唐翔千、尤淑圻，弟妹慶年、英敏同好多親戚，唔係做會長就係會董，唐家千字輩同年字輩兩代人幾乎空群而出。唐媽媽解釋，因為唐家係無錫人，所以加入商會支持家鄉發展。
陳永棋忙道賀
同無錫商會一家親，唐唐噚日到場主禮順理成章，佢一到場唔少人好似見到準特首咁紛紛恭喜佢。政協常委陳永棋第一時間上前道賀，「恭喜司長帶出幾個馬位，贏足成條街。」近日有民調顯示市民投票選唐英年做特首遠遠拋離梁振英，陳永棋身為唐家軍猛將，開心到好似中咗馬等派彩咁，「唐司長係好合適人選。」
八方問陳永棋，唐唐未表態參選喎，點解咁快恭喜佢，陳永棋話：「佢扮嘢啫！」唐唐兄弟田北俊比較矜持，話拋離梁振英好合理，「佢係司長，應該領先咁多。」唐英年細佬慶年噚日都有現身，佢亦話對大佬民望遠超梁振英唔意外，因為一直有好多人支持唐英年，「我阿哥一直都好受歡迎，就算喺屋企，佢都係咁受家人歡迎。」
細佬信心十足
大佬有機會做特首，屋企人有冇估量過勝算？唐慶年話信心十足，「我當然對阿哥有信心，唔係點做佢細佬？」至於梁振英係咪相形見絀冇得鬥，唐慶年警覺性好高，即時封口，「呢個問題唔講得，講咗俾人鬧。」
唔通驚俾阿媽鬧？因為唐媽媽噚日對唐唐領先表現得十分克制，一講到選特首呢個話題，就話太敏感，目前唔適合多講。唐媽媽唔敢多口，一家之主卻冇有怕，唐英年父親唐翔千被問到唐、梁特首之爭，唐唐出線機會係咪大好多時，唐翔千十分慎重咁講出六字真言，「現在時間太早。」唐翔千係本地上海幫大老，人脈遍及京、滬，唔通連佢都未收到阿爺祝福唐英年風聲？
mailto:[email protected]