第21屆亞姐－－辣㷫高層
「2009亞洲小姐競選」港澳賽區原定選出13位參賽佳麗，當中「DCup關之琳」7號仝曉燕雖被傳整容，但她仍是大熱門，可是近兩次宣傳活動，她都以病為由甩底，但卻被拍到相約一班老細級的男子在佐敦吃火鍋，激怒亞視。高層葉家寶指若明天仍找不到仝曉燕，會取消她的參賽資格。
亞視「2009亞洲小姐競選」將於11月舉行決賽，為催谷宣傳，亞視近日頻頻安排佳麗見傳媒，昨日港澳賽區的12位佳麗在金鐘會見形象顧問。22歲的內地佳麗、有DCup關之琳之稱的7號仝曉燕已連續兩度以病為由缺席，亞視也未能與她聯絡，大會表示若明天仍找不到她，會即時取消其資格。
被指整容冧富商
今次港澳賽區本有13位佳麗入圍，7號仝曉燕昨日再次缺席，但有傳媒拍到她日前化濃妝穿熱褲，在佐敦會合一班男女朋友吃火鍋。貴賓房中的猛男表現豪氣，很有大老闆風範，席間仝曉燕以柔弱聲線與眾男子對談，冧得眾男笑不停。
仝曉燕初選時已是非多多，她被揭曾參加內地女子組合「青春美少女」，但因表現欠佳被擯走，有指她其後到過韓國幾次，往日的單眼皮、扁鼻和包包面全部起了重大變化，最離奇是咪咪忽然升至DCup，變身後又入讀上海戲劇學院。有同學爆料指她無心向學，最勤力竟是狂冧富商。
對於仝曉燕失場，亞視高層葉家寶表示未聯絡到她，只找到其提名人，但提名人也表示找不到她，葉家寶說：「佢自從喺澳門活動之後都失蹤咗，之前係因為證件嘅問題要返去內地，後嚟提名人又話佢病咗，咁家又話佢想去讀書，屋企人又唔想佢去選。
「因為佢真係失蹤咗成10日，今次係最後通牒，我哋會到星期四（即明日）為止，因為佢入圍之後都簽咗一啲參賽合約，唔可以無故退出，即使去讀書佢都未有正式申請。」葉家寶表示即使取消仝曉燕資格，大會也不會再候補另一參賽者，但亞視會保留追究法律權利。
8號戴瑞姍感着數
8號戴瑞姍早前到澳門宣傳，與仝曉燕同房，問她可察覺仝有意退選？她說：「我哋係有傾吓偈，不過都冇傾呢啲，嗰時佢心情都OK。」
戴瑞姍表示若仝曉燕退選便很可惜，她說：「少咗一個會覺得可惜，但對每個人嚟講都係着數嘅，我相信佢咁大個人都識照顧自己o架。」問到5號林紫君可覺贏面較大？她說：「唔會，少咗一個人好似冇咗團隊嘅感覺。」
採訪：王崇穎
攝影：葉君海
