貧者越貧富者越富。好似名校拔萃男書院咁，年年籌款起碼袋幾千萬，換轉其他學校可能已經夠食幾年，但對男拔嚟講都唔夠起個音樂廳，況且錢邊個嫌多，噚日學校又推出新籌款方法，就係同銀行合作推出一張叫「出類拔萃」嘅信用卡，畀家長、校友同教職員申請。
交學費有雙倍回贈
唔少男拔校友同家長都係有米之人，呢張卡都要去到白金卡嘅層次。至於張卡點同學校籌款？原來卡主消費後，銀行就會畀番一定百分比嘅簽賬額學校，卡主變相捐款畀學校；若果卡主用張卡幫仔女交男拔嘅學費、書簿費，仲會得到雙倍回贈。使錢順便幫母校籌款，相信會受校友歡迎。
校長張灼祥強調，個計劃唔係佢諗出嚟，反而係做銀行嘅校友主動送上門。早前張校長先話金融海嘯令籌款難咗，噚日佢又拍晒心口話籌款冇問題，呢個計劃只係錦上添花，仲話希望校友好似歌星林子祥都響應吓。
八方計吓數，男拔中小學一年學費加埋起碼七、八千萬，如果個個家長都用出類拔萃卡交學費，學校從中收番十萬八萬真係無難度，連埋嗰啲乜費物費，都幾和味。