聽人講，曹仁超（曹志明）之《志雲飯局》內容，刊於《明報周刊》，於是走去7-11買咗一份，係林青霞做封面嘅，點知內有曹仁超，不過係講其他嘅事，並非《志雲飯局》訪問記。買周刊時，冇散紙，於是用八達通doo一doo，方便到極。
後來諗起，八達通或者要增值噃。下午到中環地鐵站增值，貪過癮仄吓過去紀錄，一仄就驚驚地，以往幾個月去過邊度搭車買嘢，一目了然，唔怪得警察會用八達通資料破案。科技發達之後，保持私隱甚艱難，「大阿哥」（BigBrother）或對頭人要查你嘅話，根本無所遁形，除八達通之外，用信用卡、用私人會所卡、用公司僱員卡、用公司派嘅電話、用私人電話，全部都會暴露行蹤，無所遁形。即使唔用任何電子卡，人在中環行街，都唔知有幾多部CATV攝影機追蹤自己。過往睇偵探小說/電影，嫌疑人物要向警方提供不在場證據，現在唔使喇啩？身上有部手機已可以澄清或證明一切啦。
回到寫字樓睇IHT，咁蹺有一位專欄作家AdamCohen（《紐約時報》編委）寫locationalprivacy，嘆息個人行蹤全無所遁形，在曼赫頓走去邊度都有電子紀錄，而且紀錄幾乎可以永久保存，將來唔知如何俾人運用、利用。呢啲紀錄是否應該每隔一段時間就要刪除呢？
周日IHT又有一篇文章講及倫敦大英圖書館每日收集數以萬條計嘅電郵、電話、會議紀錄、電子文件等等，窮於應付，將湧入嚟嘅資料分類都分唔切。一位歷史學家感嘆追查過往歷史，最想搵到原始資料、原本文件，但未來史家寫今天歷史，恐怕無法子搵到時間嚟分析今日嘅大量原始電子資料，況且一啲資料有密碼保護，下一代不知如何解讀。
左丁山冇歷史學家想得咁遠，只係諗到目前我地一方面講甚麼私隱條例，保護私隱，自己嘅行蹤私隱卻是「半公開秘密」，掌握在電訊公司、八達通嘅電子檔案之中，「大阿哥」不費吹灰之力就可監控目標人物。新私隱條例應該明令規定所有呢類資料只可保持三至六個月，逾期必須全部永久銷毀！