家陣球壇係「o靚」天下，列強紛紛向有潛質嘅「牛奶嘴」招手。好嘅，奇貨可居，將來賺一大筆；唔好嘅就成為「毒奶嘴」，食死人都有知。
枱底畀錢普巴雙親
講嘅當然係車路士涉嫌非法收「o靚」被罰一年唔可以買人單嘢，越鬧越大，家陣輪到曼聯一身蟻，俾人踢爆為求引入心頭好，對人家長送完20萬歐元（約230萬港元）又送樓，一旦罪成肯定受罰，咬住奶嘴嘅領隊費格遜，家怕且震過貓王。
今年5月，曼聯由今季降落法乙嘅勒哈弗爾簽入16歲「牛奶嘴」普巴，當中原來牽涉枱底交易，勒哈弗爾早幾日發表聲明投訴曼聯私底下教唆個小兵轉會，行「家長政策」後，會長盧維爾日前連曼聯畀咗幾多甜頭人都講埋：「好簡單，畀10萬歐元人哋媽媽、畀10萬歐元人哋爸爸，然後仲有樓送㖭！」
消息指，曼聯仲向普巴雙親承諾，到普巴17歲仲會有人工加。話晒勒哈弗爾一年花500萬歐元喺足球學校，投資好大，曼聯一個屈尾十就搶奪人哋嘅資產，如果查到係真，怕且刑罰唔會輕過車仔，你話假如曼聯被禁一年唔可以買人，對一個要打幾條戰線嘅霸主嚟講，自然係天大嘅事。
晏尼臣燒車仔錢冇用
講番車仔，唔單止因為體育總監晏尼臣違規簽小將，累到球會未來一年唔可以招兵買馬，《世界新聞報》計咗佢上任4年嚟喺發展青訓上花咗球會大概7.9億港紙，原來得個桔，幾年嚟居然冇一個年輕球員夠班殺入車仔A隊，咁嘅眼光，咁嘅營商之道，怕且佢呢份高薪厚職凍過水。