中大校長劉遵義做到出年6月底就約滿離任，佢噚日主持任內最後一次開學禮，向幾千名新生傳授求學同做人之道。佢係校長，又係經濟學權威，亦係行會成員，但就同學生講，咪信晒佢。劉校長任內有唔少風波，畀一啲學生同校友叫過下台，叫學生唔好信佢，莫非佢自我反省過？
其實，劉遵義講嘅係求學態度，叫學生要時時抱住懷疑嘅心，唔好輕信睇到、聽到嘅嘢，要去搵出真相，仲話：「唔好相信我同老師所講嘅」。其實唔使講到咁論盡，讀過大學嘅人都知，呢啲叫「獨立思考」，唔好盲目相信權威。不過，知易行難，唔少讀咗好多書嘅人都未必做得到。劉校長循循善誘，點知台下班新鮮人完全冇反應，冇人笑，冇人拍掌。劉校長跟住又醒佢哋第二招，話時間有限，學生要識得選擇，"dowhatyouloveandlovewhatyoudo."，咁先至事半功倍。佢又同學生講，「三人行必有我師」，叫新生交朋友要互相學習。
勸勉新鮮人要誠實
講到做人態度，劉校長語重心長咁勸勉新生一定要誠實，仲一副「亞瑟王」李國章口脗警告新生，唔誠實嘅話"youwillpayattheend"。港大呢排由上至下咁多枯枝，劉校長可能想教定啲學生引以為鑑。
劉校長喺今年開學禮好似特別感觸，典禮後佢話好開心：「第一次同最後一次（心情）梗係有啲唔同……六年，有啲感情嘅！」以前批評過劉校長嘅中大校友關注組發言人繆熾宏噚日話，劉遵義都就嚟走，冇謂再講佢。
講返今年啲新生，中大今年取錄14歲嘅「神童簡sir」簡文鋒入讀物理系，噚日佢婉拒傳媒訪問。但佢啲同學話，唔擔心夾唔到。大佢5歲嘅Emma喺迎新營同佢同組，覺得同簡sir好啱傾，唔使特別照顧，「佢都係一個幾大學生嘅大學生。」簡爸爸Kenneth話個仔適應得幾好，仲畀佢住宿舍㖭。
mailto:[email protected]