內地放寬QFII申請額度，點樣會益到港股？事關錢又唔係掟落港股市場，不過，諗深一層，放寬外圍資金流入大陸股市買貨，無疑係托市手段之一種，如果內地A股持續造好，其實對港股亦有利，因為家陣港股表現跟A股走，港股起碼少一層隱憂。
內地科網股近日都有好表現，其中騰訊（700）越升越有，股價好似放紙鳶一樣越飄越高，昨勁升5.70元，收報128元；另一隻阿里巴巴（1688）亦升破52周高位，收報21.90元。不過，網龍（777）因業績倒退，近期股價跌過一輪，但跌近100日線水平似搵到支持，昨反彈2.8%，收5.87元。
目標價10元
至於金山軟件（3888）就叫人略感失望，事關該股業績唔失禮，4月至6月第二季純利按年增90%至9655萬元（人民幣．下同），中期純利亦按年升83%至1.97億元。
金山軟件股價相對落後，昨逆市挫1.9%，收8.72元，按理唔應該咁曳，伺機買入，博升破短期降軌，目標10元。
方星俠