醫管局主席胡定旭今日55歲牛一。身形一向有番咁上下嘅肥胡，話生日願望係減10磅去到180磅左右，但近期咁多醫療事故，佢化悲憤為食量，所以佢要減肥成功，就先要醫管局生生性性，唔好再出事。
身兼智經研究中心主席嘅胡定旭噚日同傳媒茶敍預祝生日，佢好鍾意食碳水化合物，少少咖喱汁撈飯都食得津津有味；加上醫管局嘅醫療事故好似「妙麗手袋，天天新款」，佢要化悲憤為食量，想瘦都難。
肥胡仲話，最怕晚上7點後或者周末，接到醫管局質素及安全總監梁栢賢嘅電話，因為打親嚟都冇好嘢，一定係有重大醫療事故要滙報。咁啱生日會期間肥胡電話不停響，搞到成班記者擔心又有醫療事故。