大新銀行（2356）與城中一級學府推出白金信用卡，不過呢間學府並非大學，而係名人輩出嘅拔萃男書院，只要係男拔校友、家長、職員就可以申請呢張「大新出類拔萃白金卡」。點解會係男拔？事關大新銀行董事長王守業係男拔校友囉。
部份簽賬撥捐母校
王生笑笑口咁話，細個讀書時見到校長就會好驚，實係冇好嘢發生先會見校長，難得今次係懷住開心嘅心情見校長，因為幫母校發行信用卡嘛，部份簽賬額仲會撥捐男拔作為教學同埋發展用途。
兒時回憶永遠美好，王生喺男拔畢業至今足足有半個世紀，不過一見番校友就展現歡顏，仲開心到即刻帶番條男拔領呔。今年適逢男拔140周年，11月20號會搞一個慶祝聯歡會，每席盛惠10萬銀，王生話，希望拎到第一張「出類拔萃卡」後，即刻贊助宴會。