筆名方卓如嘅龔耀輝，N個月前被踢爆同now新聞靚女主播林燕玲交往之後，若隱若現咁喺傳媒面前現身，冇間斷避談背妻偷食。但係呢位財經界才子沉寂咗一輪後，原來有新動向，就係佢搵咗一份新工，加入創業板公司財華社（8317）旗下財經資訊業務幫手。華華即時向當事人求證，佢冇否認其事，只係語帶友善咁拋低兩句：「暫時冇乜嘢講住，遲啲再講啦﹗」然後就閃電式收線。
根據路邊社消息，龔耀輝已返咗半個月工，主要負責重整「財華中國網」，經常往返神州，絕少喺香江露面，所以同本港員工冇乜兩句。
龔耀輝之前為咗參選立法會議員而辭去中國金融租賃（2312）CEO一職，但又好神秘咁保持顧問工作，藕斷絲連，家降呢走去財華社轄下公司打工，有乜鴻圖大計，就只得佢至知道嘞。