劉德華俾本報獨家踢爆喺美國賭城拉斯維加斯結婚後，終於肯公開認妻，畀番個名份呢位跟咗佢24年嘅大馬姑娘。朱家嘅背景可謂眾說紛紜，之前有報道話朱爸爸過身後留下成億財產，但噚日有讀者報料，話朱麗倩只係出身小康之家，同大馬富豪陳志遠係冇親戚關係。
由於朱麗倩屋企唔係有錢，所以佢冇出國留學，學歷只係一般，普通話唔錯，但英文就麻麻。朱爸爸開紙紮店前，曾經開過一間普普通通嘅餐廳，幾個女包括朱麗倩都幫過餐廳做嘢，後來餐廳頂咗畀人，就開咗間紙紮店，雖然唔係乜大生意，但總算三餐不愁。後來朱麗倩同華仔拍拖，華仔喺經濟上都有孝敬朱爸爸。
喻可欣拍賣反應升
至於華仔同朱麗倩點識，報料人就講咗另一個版本，話朱麗倩嘅哥哥同朋友夾份開咗間夜店，當年曾志偉同華仔大班人嚟幫襯，佢哥哥就乘機介紹妹妹畀華仔識，兩個人就係咁開始咗喇。
此外，喻可欣日前喺露天拍賣網站（ http://class.ruten.com.tw/user/index00.php?s=sanlih_88），拍賣當年華仔同佢相愛時所送嘅5個毛公仔同1個心形枕，款項會捐畀台灣紅十字會。呢批物件噚日嘅反應比之前好，暫時以小雞公仔嘅1 ,530新台幣叫價最高。
