內地政策口號多多，先有「保八」，繼有「動態微調」，最新係「維穩」。上周五早上喺財經節目中，隱約聽到有人話睇番奧運時經驗，呢次國慶60大壽都可能係見頂之時，叫大家放心造淡。但下午3時後，期指出現驚嚇6分鐘，喺過萬張期指合約成交下，被挾升超過800點。不過都好難怪，個市日升日跌，加上又正係恒指Rebalancing之時，大戶梗係機不可失。還記得對上一次咁癲，要數番去「勁假時段」嘅MSCI大換班。
從近期官方舉動，呢次60大壽似乎要全國上下歌舞昇平。同奧運時一樣有示威，呢次緊張到要打記者；同樣係跌市，呢次連環出口術穩股市，先有暫緩調整銀行次級債入賬方法，繼而向產能過剩行業的進口原材料提供補貼，最新索性話部份之前被點名行業，好似太陽能多晶硅原來無產能過剩，總之就要好似人行樊綱咁講，穩定最緊要。
一聲加大QFII額度，市場又憧憬埋QDII有望放寬，挾淡倉的犁庭掃穴行動即時展開，終於夾死埋20400點嘅2億份熊仔街貨先收手。聽Banker講，外資早喺QFII實施初期投入大量資金，今時今日回報已有一百幾十倍，根本唔急於放新錢入內地。另一方面，內地居民投資港股已係公開的秘密，QDII即使放寬，亦唔會係第二列港股直通車。
工行中行建行隨時開快車
不過，車一樣會開，因為再有數個億的可愛「小維尼」正在20500至20800向大家招手。一如所料，工行（1398）、中行（3988）、建行（939）上周五已擺脫頹勢，當中工行、建行將有望挑戰三頂阻力，中行亦已突破8月以來的長方形頂部，隨時再開快車。
點解會話「快」車，因為幾隻內銀股在上周五抽升，帶動埋個別上市期權亦見底回升，當中工行同建行喺過去3日就升到3個波幅點至36%的水平，反映市場預期兩隻股短期爆上或爆落的機會都大咗，持貨者都想買保險以防出現調整。
不過即使上市期權多番需求，工行、建行窩輪引伸波幅不升反跌，閒閒哋都單日縮2個波幅點。雖然賺錢沽貨的可能唔係好覺收少咗，但亦反映發行商都可能對冲唔切被挾親，唔係咁肯畀好價回收。輪友話，有個別輪商近期沽咗唔少較價外嘅仙輪出街，正股突然急升，交易員都慌忙買期權或正股對冲。多方面利好，今周好友可能飲得杯落。
胡孟青