被證券界形容為「中國P&G」嘅恒安國際（1044），創辦人之一、副主席兼行政總裁許連捷同華華講，唔經唔覺，出年就係恒安成立25周年嘅銀禧紀念，集團已諗定喺總部搞個小型展覽會，將啲舊產品放出嚟畀大家回顧吓，仲會順便開放埋「基地」，將個好勁嘅污水處理系統，畀大家參觀㖭！
組學生團參觀污水系統
許總話，大家要特別睇佢哋個污水系統，因為造紙過程中會產生好多污染物，而佢哋用咗個系統咁耐，都冇俾有關部門檢控過，就證明咗個系統有幾勁。聽許總講，集團仲會特別組織學生團體去參觀，希望可以借呢個機會，向下一代灌輸環保意識喎。
既然係25周年，咁又會唔會翻出當年嘅經典產品呢？許總話，暫時冇咁嘅打算，因為同家比，當年嘅生產技術同設計始終比較落後，驚做咗出嚟，冇人買咪盞搞！咁25周年咁高興，又會唔會派特別股息慶祝吓呢？許總笑笑口咁話，出年咪知囉。