1959年4月1日成立嘅政府新聞處（GIS），50年嚟幫政府同高官擋過唔少箭，又要同傳媒打交道搞公關。為咗紀念部門成立咗半個世紀，佢哋喺呢個月15號同16號朝早10點至夜晚7點半，會喺中央圖書館地下展覽館搞個展覽，展出唔少珍貴嘅歷史圖片，免費畀市民回顧吓香港同新聞處一齊走過嘅日子。
展出嘅圖片包括60年代齊齊穿膠花嘅情景、63年嚴重水荒市民排隊攞水嘅辛酸、80年代尾多項大型工程動工嘅一刻、97年回歸交接儀式等等。有啲往事又真係唔講新一代都唔知，好似66年新聞處搵演員關南施拍咗套《魔法石》，用嚟介紹沙田望夫石嘅由來；至於清潔香港運動嘅「垃圾蟲」外形，家睇番雖然有啲粗糙，但當時又真係好深入民心。