以狙擊領匯（823）而被港人熟知嘅英國兒童基金TCI，自金融海嘯後聲勢已大不如前，彭博資訊出版嘅月刊《BloombergMarkets》9月號做咗一個專題，訪問咗已經離開TCI嘅何志安，講TCI點樣敗走日本，從中反映日本雖然貴為主要金融市場，但企業管治文化依然保守，外資想喺日本擴展唔係咁易。
話說TCI喺領匯初嚐勝果後，06年底想將同一模式應用喺日本能源公司J-Power，佢哋持股9%，想派代表入董事局，但係阻力重重，想公司增加派息又唔得，最終喺舊年10月售股離場，蝕咗成1.3億美金。
同日搞股東會難出席
其實日本投資者不嬲都「好乖」，上市公司股東架構亦相對較穩定，與大股東為善嘅股東喺1974年嘅比例高達62.2%，就算近年亦都有成36.8%。
如果喺日本想挑戰公司嘅決策，就要睇你係咪孫悟空，識分身術，皆因半數上市公司都安排喺每年6月最後一個星期五開股東周年大會，你可能每年只出席到一間，質問公司管理層。就算TCI只針對一間，搞咗幾年都要放棄，可見喺日本做積極投資者會好激氣。