運輸業關注燃油價格聯席會議噚日搞咗個相當騎呢嘅「餓死油魔行動」，二十幾部車喺擋風玻璃貼住標語，排住隊慢駛入葵涌一個加德士油站，每架車只幫襯10蚊，擺明同油公司玩嘢。
入$10油攞金牛找數
以前都搞過餓食油魔行動嘅蔣志偉話，油公司加快減慢，你抗議咩，佢就係咁意減少少畀你，好似今個月4號象徵式減油價，減咗之後，油價依然高企。佢話，呢次發起「餓死油魔10元大行動」，係要主動出擊，目的係要搞到帶頭加價嘅油站好唔得閒。
佢條橋就係每架車每次加油，都只係幫襯10蚊。蔣志偉話，明知10蚊入唔到一公升油，擺明係要玩嘢。噚日響應行動嘅車主入咗10蚊油之後仲抵死，喺銀包攞咗張1,000蚊紙出嚟，話冇散紙，要油站職員走來走去，數番990蚊畀佢哋。
蔣志偉話，今次行動會玩到下星期日，希望多啲車主響應。不過，八方擔心呢個行動最後都係無功而還，因為佢哋主要都係玩到班油站前線員工，決定油價水平嘅油公司高層又唔使落手落腳做，針唔拮到肉，未必屈服。