上周六嘅世盃外圍賽賽果都算幾正路，惟獨墨西哥作客竟然可以大炒原本喺中北美洲及加勒比海區排第一嘅哥斯達黎加3:0，都幾令人跌眼鏡。墨西哥贏波之後，搞到形勢變得好混亂；原本排第一嘅哥斯達黎加跌落第4，洪都拉斯就冷手執個熱煎堆升上榜首。不過，頭4名積分差距只係1分，邊3隊可以直接出線，真係要鬥埋最後3輪先知，我求大俠就睇好墨西哥喇！
自從墨西哥暑假贏咗美洲金盃後，狀態可以話「U型反彈」；特別係年輕射手杜斯山度士，更加「弗」到漏油。喺巴塞出身嘅杜斯山度士一直被譽為明日之星，點知上季轉投熱刺後靜晒，季中仲俾球隊外借去葉士域治，真係埋沒天份！不過杜斯仔家咁「弗」，熱刺應該唔捨得再外借佢啩？