劉德華已經認朱麗倩為妻，但堅稱冇仔女。由於華仔係新聞人物，令舊愛喻可欣都被翻舊賬，佢噚日同媽咪離開台灣，搭飛機去重慶探望患肺癌嘅爸爸喻舲居。有指華仔人工授孕成功，喻可欣話：「祝福他們。」佢自爆日前相睇過5、6次，但男方最後都冇晒影蹤。
喻可欣話相睇由妹妹安排，男方年紀喺30到40歲之間，從事金融、房地產等職業，雙方只係通電話，有啲見過幾次面，但最後全部失敗，喻可欣話：「對方年紀不是問題，只要彼此快樂就行了。」佢仲話唔介意奉子成婚㖭！
陳果：或有許多新劉太
喻可欣淨係想保留同華仔簽嘅婚書，佢話：「丟掉怕會被撿到，就先擱在保險箱，反正我也不會常去看它。」
為咗重新出發，喻可欣上星期決定拎華仔以前送畀佢嘅定情毛公仔同心形枕共6樣嘢，喺台灣一個網站（ http://class.ruten.com.tw/user/index00.php?s=sanlih_88）拍賣，將賣得嘅錢拎去賑災。呢批物品會拍賣到大後日中午為止，截至噚日截稿前，拍賣都唔算熱烈，其中加菲貓公仔僅以670蚊新台幣（約160港紙），暫時叫價最高。
此外，有指華仔已婚會流失fans，導演陳果噚日出席活動時話：「劉華粉絲一定之前已經知道，舊的不去新的不來，到時又會有許多新劉太。」
