香港樓賣15萬蚊一呎，你信唔信？雖則呢排香港樓市旺到爆，豪宅造價遠超過97，但斷估冇可能啩。噚日就有個消息震驚地產界，市傳同中信泰富（267）前主席榮智健為鄰嘅淺水灣道73號大屋，以9億銀賣出，以現有樓面計，呎價高達15萬銀。如果真係賣到呢個價，不但比全亞洲紀錄保持者山頂洋房倚巒2號屋喺08年創下嘅呎價5.6萬元高出一大截，仲隨時打入健力士世界紀錄大全㖭。
華華噚日一收到呢個消息，當堂打個突，半信半疑，梗係要搵人求證吓。市傳呢單刁由仲量聯行促成，買家係內地神秘超級富豪，華華即時打畀仲量聯行國際董事兼住宅部主管曾煥平證實吓，佢話：「10萬蚊（重建後樓面呎價）一呎，邊有可能，都唔知邊個亂咁吹，完全離晒譜，係我做就好，可惜唔係。」
放盤10年賣唔出
曾煥平越講越勞氣，「屋主我都識，佢放咗盤10年，但叫價貴得滯，所以一直賣唔到，07年大旺市開5億都賣唔到，家邊有可能賣9億。」佢仲話，如果呢塊地真係值10萬蚊一呎，鰂魚涌太古城咪要兩萬銀，到時香港樓市唔冧就假。
呢間大屋佔地13094方呎，上蓋起咗幢6000呎大屋，若用盡0.75倍地積比重建，樓面增至9821方呎。
李華華