本地甲組聯賽昨在香港大球場上演揭開戰幕，衞冕的南華在未受考驗下，4:0大勝升班馬大中，順利打開勝利之門；只是開鑼戰只得2,230球迷入場，入場數字是近3季新低之餘，也令人擔心今季港甲全面實行主客制下，球市將進一步受壓。
由於旺角場正進行長達20個月的改建工程，今屆聯賽要分散到港九新界8個場地進行，其中力爭聯賽「4連冠」的南華，繼續在其「主場」香港大球場作賽。足總今季更改過往揭幕戰由聯賽冠軍對亞軍、為球季造勢的方式；改由上季冠軍南華打頭陣，對手則抽籤決定。結果南華昨在揭幕戰，遇上成軍最遲的上屆乙組亞軍大中。
天氣熱影響入場意欲
正如南華足主羅傑承所說，球迷對大中的人腳實力不太了解，預期此戰是強弱懸殊，打擊球迷入場意欲；結果一如所料，揭幕戰只靠南華「孭飛」，可惜昨午天氣炎熱，大球場氣溫估計逾攝氏33度，影響入場人數。
大部份球迷都坐在陰頂的東看台，西看台球迷又差不多全躲在陰頂位，觀眾席幾乎全是「吉位」，場面甚冷清。羅傑承表示：「之前冇留意今日的開波時間，如果早知道開3點，會提議押後開波時間；開3點，即2點鐘要出門口，這是最熱的時候，戲碼又不算強，要球迷冒熱到大球場觀戰有一定困難，現有逾2,000球迷入場都算滿意。」
下月對傑志應熱鬧
南華踢罷此戰，周三續在大球場出戰公民，到時港隊前鋒陳肇麒及中場梁振邦兩名傷兵可望復出；只是大球場踢夜波，對手公民並沒有太大號召力，預計場面會繼續冷清。下月南華會在大球場對爭標隊伍天水圍飛馬及傑志，其中對傑志更安排在周六的最佳檔期，相信到時場面會變得熱鬧。
南華於周五早上起程到烏茲別克，備戰下周二亞協盃作客對尼夫治的8強首回合；羅傑承預計球隊周六抵達烏茲別克，之後有3日時間適應當地天氣及環境，希望首回合作客能保不敗。
本報訊
今季揭幕戰失收估計原因
1.天氣炎熱
2.宣傳不足
3.戲碼較弱
4.更改賽制
甲組聯賽昨日賽果
南華 4:0(2:0) 大中
入球者（南華）：郭建邦18'、76'、卡尼祖43'、73'
入球者（大中）：/
入場人數：2,230人
購票人數：1,687人
門票收入：78,260元
近4季聯賽揭幕戰入場人數
球季：09/10 對賽球隊：南華vs大中
入場人數：2,230人
球季：08/09 對賽球隊：南華vs公民
入場人數：2,523人
球季：07/08 對賽球隊：南華vs傑志
入場人數：3,141人
球季：06/07 對賽球隊：愉園vs晨曦
入場人數：1,343人
資料來源：足總
各有各忙
花絮：公民吼路見證南華大勝
上屆班霸南華驚班球迷餓波太耐，一開鑼就即刻炒升班馬大中4粒嚟滿足吓班擁南躉。唔知噚日專登入場「吼路」嘅公民球員，包括新加盟嘅拉菲亞（左二）會唔會俾南華嚇窒呢？事關佢哋首戰（周三）對手正正係南華。
花絮：慈善獎券得獎者冇位泊車
南華同傑志上月中場香港慈善盾，當晚大家畀咗兩?水買慈善獎券，喺噚日揭幕戰中場休息時頒獎，結果由從事酒店業嘅陳生（中）抽中頭獎「掃把佬」；拎住條大車匙嘅佢話架車唔會拎住，因為拎咗返屋企都唔知泊喺邊。
花絮：港甲特刊當扇撥凉
新球季開鑼，足總一如以往整咗本幾詳盡嘅特刊，介紹吓每隊波啲基本資料同新球季球員名單等，令球迷更了解每隊波嘅最新動向；呢本嘢仲要唔使錢，當然吸引咗唔少入場人士走去拎啦！就算唔睇，噚日咁熱拎嚟撥凉都過癮啦！
花絮：大中球員有粉絲撐場
大中雖然係升班馬，但陣中嗰位美籍華人中場梅示敦，噚日就有十幾位外籍粉絲專程去撐場；當中帶頭為梅示敦打氣嘅，就係佢做教師嘅女友（中），由開波打氣至完場，輸波一於少理。
