政府微調驗毒計劃之後，雖然個別團體好似律師會咁都算係收貨，但仍然有唔少市民尤其係年輕人未能釋疑。有班從事創作行業嘅有心人針對呢個議題，設計咗一系列作品，例如有丸仔砌成嘅煲呔、虛擬學生驗毒日記、「向毒品說不、向驗毒說不」海報等等，諷刺特區政府對付毒品問題治標不治本，「如常地採取鴕鳥政策」，冇正視問題根源。
應正視濫藥原因
呢個叫「九畫家」（英文名jiuu）嘅獨立組織，係由一班從事設計、畫畫嘅香港人組成，每個月佢哋會針對一啲特定主題，例如頭條新聞或者城中話題去創作，再將呢啲畫作透過電郵發放開去，遠至世界各地。佢哋仲會呼籲收件人將作品傳開去，同其他朋友分享，等大家知道香港發生緊乜嘢事。
「九畫家」成員之一bLYHn（藝名）話，我哋英明嘅特區政府自從見到接連幾單青少年濫藥嘅嚴重畸士，到家都只識提出校園驗毒方案嚟解決問題，但對於青少年濫藥問題點解會嚴重到如此地步、校園驗毒係咪可以解決呢啲問題、有冇其他更有效更治本嘅方法等等，都唔去討論唔去正視，所以希望透過呢啲創作，刺激大家多啲討論。八方都認為，有時要解決問題，除咗誠意仲需要創意。
不過，政府推行驗毒似乎已經係事在必行。香港專業人士協會噚日搞咗場抗毒講座，請保安局局長李少光同行政會議召集人梁振英（CY）嚟撐場。李少光話，家香港青少年吸毒問題非常嚴重，佢好高興社會各界對呢件事高度關注，佢專程嚟出席呢個抗毒活動，就係盡一分力咁話。呢番話真係冇乜新意，李局長講完就雞咁腳走咗，趕去搭飛機，訪問北京、青島同廣州嘅相關部門，傾吓跨境毒品問題。
至於CY難得有位攝，梗係嗱嗱臨話佢都好關注本港青少年吸毒問題，只要有方法幫到啲後生仔脫離毒海，可以早一個禮拜就早一個禮拜，刻不容緩咁話。講到驗毒，佢話相信好多家長同學生都接受改良咗嘅微調方案，希望如期上馬。禁毒專員黃碧兒話下月會去大埔各間中學簡介計劃，希望今年12月正式推行。
mailto:[email protected]
