身為校長的譚詠麟（阿倫），前日黃昏率領一班後輩band友演出音樂會，以慰勞數百位義工，當日音樂會在戶外舉行，由於日前許冠傑個唱上有歌迷猝死，故此大會特別叮囑觀眾留意身體狀況，問到阿倫有何準備以防萬一時，他竟說：「我已經準備咗水炮，邊個暈就射番醒佢。」認真口沒遮攔。
譚詠麟前日黃昏於旺角拔萃男書院的足球場，演出港台《感動全城開拓義工世界》音樂會，同台演出還有一班後輩band友包括RubberBand、DearJane和Mr.等，另外還有劉以達及JoeyTang，身為贊助人之一的李兆基兒子李家傑亦有出席，阿倫即場唱出多首rock版金曲，以慰勞台下數百位義工在暑假付出的努力。由於音樂會在戶外舉行，加上日前許冠傑演唱會有歌迷猝死，開騷前大會以廣播呼籲叫觀眾留意身體，如有不適即到救護站求助。
「義工福有攸歸」
問到阿倫會否擔心觀眾在烈日之下睇騷易令身體不適？他表示有看報道知道許冠傑個唱意外，他們會小心為上，叮囑觀眾不要太過激動。至於有否準備以防發生意外，阿倫開始口沒遮攔說：「我已經準備咗水炮，邊個暈就射番醒佢。」
阿倫表示揀選在黃昏舉行就是避開猛烈陽光，一切小心為上，開騷前有否拜神祈求一切平安？阿倫笑說：「我福大命大，觀眾又係義工，福有攸歸，睇完家宅平安，總之乜嘢都保。」會否叫乖仔曉風做義工？由於之前阿倫表示3個月內不談囝囝，他聲稱未夠期故繼續封嘴。
封華仔o靚模殺手
另外，提到好友劉德華日前發聲明指自己未有仔女，阿倫認為各人有自己的做法，因此他不便評論，但對於有部份傳媒炒作華仔新聞，阿倫亦戥他不值，接着阿倫又搞笑說：「華仔一出就冇晒o靚模（指新聞），佢果然係o靚模殺手。」會否覺得這是好事？阿倫續說：「我點知，新聞都係俾人睇，華仔家趕走晒，冇冰淇淋睇。」
採訪：馬建華 攝影：仇志德