如果鬼佬版《無間道》開拍前傳，導演馬田史高西斯可以考慮搵格魯吉亞隊長卡拿迪斯同克羅地亞後衞哥魯卡做主角，事關佢兩個都做咗啲「二五」行為。前者喺前晚世盃外，一頭一腳擺兩球烏龍幫意大利贏2:0；後者就喺對白俄時無端端領紅，踢唔到禮拜三對英格蘭場大戰，唔使對番班英超兵。
卡拿迪斯「老烏」梅開二度
擺烏龍其實唔算咩特別事，出名如德國中場波歷克、英格蘭後衞泰利同謝拉特都試過；但好似卡拿迪斯咁「梅開二度」，就真係百年一遇。前晚格魯吉亞主場對意大利場世盃外，佢先喺56分鐘將對手中場柏林保嘅長傳，誤頂入自己龍門而令意大利領先1:0；咁都未算，11分鐘之後佢再將基斯薛圖喺左路地波傳中誤踢入網，結果意大利就靠佢「梅開二度」贏2:0，喺歐洲區第8組續居首。
卡拿迪斯踢緊意甲AC米蘭，但不受新帥李安納度重用，家陣佢幫意大利贏波，難免瓜田李下；佢賽後死晒狗咁話：「我哋其實打得好好，隊友全力作賽，但因為我兩球烏龍波而輸波，我真係好對佢哋唔住。」
哥魯卡無端領紅「有蠱惑」
我求大俠原本都覺得佢可憐，但聽多幾句，就真係覺得佢有啲嘢，佢話：「我踢完世盃外會返AC努力爭取出場機會。只要李安納度肯畀機會我，踢咩嘢位都唔介意。」
除咗卡拿迪斯，哥魯卡都「有蠱惑」。前晚對白俄場世盃外，哥魯卡鬼咁多無謂犯規，結果兩黃一紅被逐，繼同效熱刺嘅國家隊隊友莫迪歷受傷休戰後，亦踢唔到禮拜三對英格蘭場第6組關鍵戰。話時話，佢07年夏天開始效力英超，喺曼城踢咗一季就過檔熱刺。
我求大俠唔係想諗衰佢，話晒英超令佢名成利就，冇理由得罪自己米飯班主；但同時佢又唔想出賣國家，家陣咪兩全其美囉！所以話，如果《無間道風雲》拍前傳，由卡拿迪斯同哥魯卡分飾劉建明同陳永仁，真係啱晒！
